KOMEMORASAUN BA MASAKRE SANTA CRUZ 12 NOVEMBRU 1991 BA DALA XX

Halo Reflesaun, Oinsa Mak Ita Hotu Bele Kontribui ba Timor Leste Nia Futuru.

Maluk Timor Oan sira hotu, mak namkari iha Rai Ulun too Rai Ikun, Tasi Feto too Tasi Mane no mos namkari iha Rai Seluk. Mai ita halo minutu de silensiu ba ita nia herois sira, liu-liu ba maluk JUVENTUDE sira ne’ebe ho aten barani loke hirus matan hasoru invasor no kilat musan iha 12 Novembru 1991 liu ba.

12 Novembru 2011, ita komemora loron masakre ne’ebe hanaran Masakre Santa Cruz 12 Novembru. Iha tinan 20 liu ba ita nia maluk juventu barak mak lakon sira nia vida tan hakilar hakarak Ukun Rasik A’an…………..no Viva……………Timor Leste……… no seluk tan hodi hatudu la satisfas hodi hasoru invasor Indonesia nian.

Ho komemorasaun ba dala XX (rua nulu) tinan ida ne’e laos ita atu komemora liu husi seremonia deit, mai be ita ida-idak komemora hodi halo reflesaun iha ita ida-idak nia laran oinsa mak ita hotu tenki kontribui ba Unidade Nasional, Pas, estabilidade, Justisa nst. Iha Timor Leste ne’ebe ita hotu hadomi.

“JOVENTUDE MAK AJENTE PRINCIPAL IHA MUDANSA NO DEZENVOLVIMENTU NASAUN NIAN”

Tamba ne’e hau husu ba maluk sira hotu atu ita hotu halo minute silensia ba ita nia herois sira ne’e.

MIMUNTU IDA HAKMATEK

Hakmatek ba
Foho
Foho hun no be matan sira
Kdadalak no mota sira
Fatuk dalan nian
No du’ut sira
Hakmatek ba

Hakmatek ba
Manu sira be semo
Laloran tasi
Anin be hu
Ba raihenek be namkari
Iha rai be la’os ema ida nian
Hakmatek ba

Hakmatek ba
Tohu no au sira ai no airu sira akadiru no du’ut manu laen
Iha matak rohan laek
Husi Timor be ki’ik
Hakmatek ba

Hakmatek ba,
Imi nia hakmatek, ita nia hakmatek

Ba Minutu Ida

Oras atu hakmatek
Ba hakmatek tempu nian
Ba tempu moris nian
Ba ema hirak be sara an

BA RAIN
BA NASAUN
BA POVU
BA ITA NIA LIBERTASAUN
HAKMATEK BA-MINUTU IDA ATU HAKMATEK

Minute ida hakmatek ko’alia kona-ba deklarasaun independensia loron 28 Novembru 1975, bainhira hakmatek iha minute ida nia laran fo sae ba ema ne’ebe mate iha luta ba independensia nian. Tamba ne’e, poezia ida ne’e hakerek iha 28 Novembru 4 Dezembru 1975 nia le’et (Kopia husi livru ne’ebe publika iha edisaun Tetum no Portugez: Institutu Sahe ba Libertasaun, Dili 2005).